El pulisiya ya aresta con dos suspechao y ya confisca mas de P680,000 valor de droga ilegal na provincia del Lanao del Sur, un official del pulisiya ya anuncia del Huwebes.
Si Police Colonel Roberto Daculan, el director del pulisiya na provincia de Lanao del Sur, ya nombra con el dos arestao suspechao como canda Sarip Osngan Mamangacao y Alihassan Ampuan Mangacop, ambos legal el mga edad.
Asegun con Daculan, con el mga suspechao ya aresta na un campanya contra droga ilegal mga alas 5:20 del Miyercoles tarde na Barangay Bobonga-Marawi na ciudad de Marawi, provincia del Lanao del Sur.
Asegun con Daculan con el mga suspechao ya aresta despues que ya vende sila droga ilegal con un secreta del pulisiya.
Si Daculan ya habla ya puede confisca na posesion del mga suspechao sien gramos de suspechao shabu que tiene el valor de PP689,000 y mga markao sen.
Asegun con Daculan, con el dos arestao suspechao y mga evidencia ya recubri canila ya pone bajo na custodiya del pulisiya del ciudad de Marawi para el propio disposicion.
Con el dos suspechao ya aresta un dia despues que el mga otoridad ya cuji con dos personas y ya confisca P6.9 milyones valor de suspechao shabu na un campanya contra droga ilegal na Barangay Gadongan, ciudad de Marawi, provincia del Lanao del Sur. (B. Garcia) (Photo Courtesy of Lanao del Sur Police Provincial Office)