El “Ministry of Basic, Higher, and Technical Education” del “Bangsamoro Autonomous Region in Muslim Mindanao (MBHTE-BARMM)” ya entrega un edeficio de tres andanas para con el “schools division office” del provincia del Sulu.
Si MBHTE Director General del “Basic Education” Abdullah Salik, Governador del Sulu Abdusakur Tan y Superintendente Kiram Irilis del “Sulu Schools Division” ya encabesa con el inaguracion del nuevo construjido edeficio del Lunes.
Asegun con Salik el fondo para el construccion del edeficio, que ya costa P40 milyon, estaba na “Special Development Fund 2020” del BARMM.
Si MBHTE Minister Mohagher Iqbal ya habla su mensaje cay ya construji con el edeficio para dale seguridad, proteccion y buen facilidad con el de ila mga uban na agencia de educacion.
Asegun con Iqbal, importante el oficina del “schools division” para ase bueno con el systema de educacion na Sulu.
Myentras tanto, si Irilis ya expresa su gratitud con el MBHTE por el nuevo edeficio que ya dale canila el agencia.
Ya rindi tamen gracias si Tan con el MBHTE por el proyecto ya dale canila na provincia del Sulu.
El MBHTE-BARMM ta construji tamen un edeficio de dos andanas con dies cuarto na Lapak Agricultural School na municipio del Siasi, Sulu. (B. Garcia) (Photo Courtesy of MBHTE- BARMM)