Dos personas, incluido un preso, el ya aresta y valor de P6.8 millon droga ilegal el ya confisca el mga autoridad un campania contra droga aqui na ciudad del Zamboanga, asegun con el Philippine Drug Enforcement Agency (PDEA) del Miercoles.
Asegun con Maharani Gadaoni-Tosoc, el Director Regional del PDEA, con el dos arestao suspechao ya conose como canda Albadir Ajijul, 28 años el edad, y residente de ciudad de Isabela provincial del Basilan, y si Kerwin Abdila, 42, un preso na San Ramon Prison and Penal Farm y residente de Sitio Caragasan, Barangay Maasin, en este ciudad.
Asegun con Gadaoni-Tosoc, con el dos suspechao ya aresta na un compra busto mga alas 10 del Martes aga na San Ramon Prison and Penal Farm na Barangay Talisayan, en este ciudad.
Asegun con Gadaoni-Tosoc, ya puede confisca na posesion del dos arestao suspechao, un kilo de suspechao shabu enpaquetao na un paquete de plastic que tiene el valor de P6.8 millon, 10 balutan del P1,000 “boodle money” que ya pone insima un real P1,000 markao dinero, un celpon, y otro parafernales na vendida de droga illegal.
Si Gadaoni-Tosoc ya habla, con el dos suspechao ya aresta el mga operativas del PDEA cn el suporta con policia, y personajes de inteligencia.
Asegun con Gadaoni-Tosoc, un asunto por violation del Seccion 5, Acticulo 2 del “Republic Act 9165” o mas conosido como el Comprehensive Dangerous Drugs Act of 2002 at planta contra con el dos arestao suspechao.
Con el dos arestao suspechao ya pone bajo’l custodia del oficina regional del PDEA. (B. Garcia)
