Dos municipio aqui na region el tiene ahora nuevo trak de bombero, asegun con el oficina regional del Bureau of Fire Protection (BFP) del Lunes.
Asegun con el oficina regional del BFP, el mga recibidor del nuevo trak de bombero amo el mga municipio del Buug, Zamboanga Sibugay, y Katipunan, Zamboanga del Norte.
Con el trak de bombero del Buug, Zamboanga Sibugay ya recivi canda Ceferino Puerto, representante del gobierno municipal, y si Senior Fire Officer 4 (SFO4) Wilfredo Casido, Jr. el oficial-en-cargao del Estacion de Bomberos del municipio.
Ya recivi sila un trak de bombero que tiene el capacidad del mil galon desde’l quartel nacional del BFP na Manila.
Si Chief Superintendent Renato Marcial, el director regional del BFP, Alcalde Jose Michael Meiko Wong del Katipuan, Zamboanga del Norte, y SFO4 Elmer Amparado, el oficial-en-cargao del Estacion de Bomberos del municipio amo el ya recivi con el trak de bombero del pueblo de Katipunan.
Semehante como el municipio de Buug, el municipio de Katipunan ya recivi tamen un trak de bombero que tiene el capacidad de mil galon.
El ceremonia de entrega del mga trak de bombero ya hace del otro semana na quartel nacional del BFP na Manila.
El ceremonia ya atende el Secretario Benjamin Abalos, Jr. del Departamento de Interior y Gobierno Local y mga alto funccionarios designao na quartel nacional del BFP. (B. Garcia, photo courtesy of BFP-9)