28.7 C
Manila
Monday, April 15, 2024

Zamboanga: 2 muerto, 7 irido na dos accidente vehicular

- Advertisement -

Dos personas, incluido un estudianta, el ya muri y siete otros, incluido un miembro del “coast guard”, el ya iri na dos separao accidente vehicular aqui na ciudad de Zamboanga, asegun con el policia local del Sabado.

El primer accidente envuelto un trak y motorsiclo ya ocuri mga alas 12:26 del Viernes tarde na Barangay Culianan, en este ciudad.

El segundo accidente envuelto tres trak ya ocuri mga alas dos del Viernes tarde na Sitio Basagan, Barangay Curuan, en este ciudad.

Asegun con el policia, con el mga victima na primer accidente ya conose como canda Marian Mortales, 15, un Grade 7 estudianta del Culianan National High School; Micaela Francisco, 15, estudianta tamen del mencionao escuela; John Therese Tutanes, 22; y, si Danica Tutanes, 29, un miembro del coast guard.

Asegun con el policia, si Mortales ya muri na lugar del incidente mientras canda Francisco y el man hermano’y hermana Tutanes admitido na hospital.

Base na investigacion del policia, con el mga victima ya man bangga el un trak de un compania de barco que ta maneja si Arman Laranjo, 52 años el edad.

Asegun con el policia, ta viaja el trak que ta maneja si Laranjo para na costa este del ciudad cuando ya man bangga este con un motorsiclo que ta maneja si John Therese y ta sigi ancas su hermana, si Danica, quien ta viaja tamen na semehante direccion.

Na mismo tiempo, ya man bangga tamen el trak canda Mortales y Franciso, quien aquel momento ta crosa na camino pasando na “pedestrian lane”.

Asegun con policia, con el mga victima na segundo accidente ya conose como canda: Sayvier Van Ata y Aron Ata, chufer y tripulante, respetivamente de un trak que ta transporta pescao; Jose Darwin Ramillano, 47 años, chufer de un trak de cargamento; y si Jevie Mendoza, chufer de un “dump truck”.

Base na investigacion, ya man banggaan el trak que ta transporta pescao y trak de cargamento despues que ya man “over takesi Sayvier con el dump truck que ta maneja si Mendoza.

Si Sayvier y Mendoza ta viaja para na direccion del pueblo mientras si Ramillano ta viaja na direccion opuesta o para na costa este del ciudad durante el incidente.

Ya iri si Sayvier, su tripulante si Ata y si Ramillano y ambos de ila mga vehiculo ya destrosa por el puersa del banggaan.

Asegun con el policia, ya lleva canila tres na hospital pero ya declara muerto con Sayvier el doctor mientras admitido canda Ata y Ramillamo.

Nohay pasa nada con el trak que ta maneja si Mendoza, quien nohay tamen sinti duele durante el incidente.

(B. Garcia, photo courtesy of Regino Delos Santos)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -