Dos man enemigo familias na municipio de Sumisip, Provincia de Basilan, el ya conforma reconcilia el de ila diperiencia y ya somete de ila mga cuerpo na un amistoso resolucion que ya facilita el 64th Infantry Battalion (IB) y el 101st Infantry Brigade.
El ceremonia de reconciliacion ya hace na quartel del 64IB na Barangay Tumahubong, Sumisip, Basilan, del Martes.
Asegun con el 101st Infantry Brigade, aquellos quien ya conforma aregla de ila playto amo el man enemigo familias de Midzmin Asjad y de Nasser Buena del municipio de Sumisip.
Durante el ceremonia de resolucion, ambos partidos ya conforma suporta y documenta de ila colectivo deseo para acomplici paz, perdon, y unidad.
Como mga hermanos musulmanes, ya sella sila de ila mga palabra con un juramento solemne na Holy Quran.
Asegun con el 101st Infantry Brigade, ambos familias ya rindi un rifle M-16 como un acto de sinceridad.
Na su mensaje, si Brigadier General Alvin Luzon, el comandante del 101st Infantry Brigade, ya comenda con el esfuerzos del ejecutivos del gobierno local de Sumisip por buscar incesamente un pacifico resolucion del mga conflicto interno na de ila municipio.
Ya expresa tamen si Luzon su gratitud con mga organizaciones que ya suporta con el campaña del su mando para adqueri paz de largo duracion na provincia del Basilan.
Ya asegura tamen si Luzon cay preparao sila proteje con el mga Basileños contra todo clases de amenaso.
(B. Garcia, photo courtesy of 101st Infantry Brigade)