Dos asociaciones de mga siembradores desde’l municipio de Leon B. Postigo, Zamboanga del Norte el ya recivi del Martes valor de P2.4 millones proyecto de busca la vida desde conel gobierno nacional.
El 97th Infantry Battalion (IB) ya habla de Viernes cay el mga recipientes del proyecto de busca la vida amo el asociociones del mga siembradores na Barangay Midatag que ta encabesa si Bon James Templo y na Barangay Tinuyop que ta encabesa si Roel Aquino.
Asegun con el 97IB, cada uno del dos asociaciones ya recivi valor de P1.2 millon productos agricultural para el produccion de arroz.
El iniciativo ya ase posible del fondo de desarollo de paz de comunidad desde’l Oficina del Consejero Precidencial para el Paz, Reconciliacion y Unidad o el OPAPRU.
Asegun con Rene Glenn Paje, el consejero regional de paz y seguridad del OPAPRU, el objetivo del programa de busca la vida amo para dale sustenable oportunidad con mga siembradores, contribui na de ila empoderamiento economico y desarollo general.
Asegun con Paje, el OPAPRU ay continua ase esferzo para busca omento fondo y suporta de proyectos para dale el necesidades del de aton comunidad.
El programa de busca la vida del OPAPRU ta servi parte del mga proyectos del gobierno bajo na Orden Ejecutivo Numero 70 para termina el conflicto armado de comunista local. (B. Garcia, photo courtesy of 97IB)