El mga autoridad ya confisca P3.7 millones valor de droga ilegal y armas de fuego y ya aresta dos personas na un operacion contra droga na ciudad de Zamboanga, asegun con el policia del Miercoles.
Si Police Colonel Kimberly Molitas, el interino director del Zamboanga City Police Office (ZCPO), ya identifica con el dos arestao suspechao como canda Cesar Manalo, 27 años el edad y un trabajante de construccion, y su cohorte, si Alkaber Bahari, 21 años, y un ventero.
Asegun con Molitas, con el dos suspechao ya aresta na un operacion de compra busto mga alas 6:16 del Miercoles aga na Sitio Asinan, Barangay Kasanyangan, ciudad de Zamboanga.
Asegun con Molitas, si Manalo, quien un residente de Barangay Tubungan, amo el persona quien ya queda mentao na midia sociales usando pusil ta intimida con mga gente. Ademas, si Manalo ta enfrenta tamen caso de grabe amenazo puera con el caso relatao na droga.
Si Bahari, quien un residente de Barangay Sinunuc, ta enfrenta tamen caso relatao na droga ilegal.
Asegun con Molitas, ya confisca desde na posesion de canda Manalo y Bahari 550 gramos del suspechao shabu en paquetao na 11 termosellada transparente plastico sobrecitos que tiene el valor de P3,740,000, un calibre .38 revolver con cuatro bala, 54 pedaso de P1,000 robar dinero, o boodle money, que ya pone incima un real P1,000 como markao dinero, y un mochila.
Asegun con Molitas, el exitoso operacion contra droga es un directa resulta del colectivo trabajo del mga personajes del ZCPO. (B. Garcia)