Dos personas envuelto na bendida de droga ilegal el ya aresta mga otoridad na separao campanya contra droga na provincia del Zamboanga del Norte, el pulisiya ya anuncia del Huwebes.
El mando rehyonal del pulisiya ya nombra con el mga arestao suspechao como canda Al-Joren Maldeza Jumala, 23; y si Charlie Atad Lantang, 35, años el edad.
Asegun con el pulisiya con Jumala ya aresta na un “buy-bust operation” mga alas 2:55 del Miyercoles tarde na Barangay Balagonan, Siocon, Zamboanga del Norte.
Ya puede confisca na posesion de Jumala cuatro gramos de suspechao shabu que tiene el valor de P27,200, un calibre .45 pistola con mga bala sin licensia, y P500 markao sen.
El pulisiya ya habla cay con Lantang ya aresta na otro “buy-bust operation” na Barangay Poblacion East, Salug, Zamboanga del Norte del Miyercoles.
Asegun con el pulisiya ya puede recubri na posesion de Lantang 0.5 gramos de suspechao shabu con el valor del P3,400, y P500 markao sen.
Ya detene con el dos arestao suspechao en preparacion para el plantada del formal asunto encontra canila dos por violacion del “comprehensive dangerous drugs act of 2002”.
(B. Garcia, photo credits to the owner)