Total de 170 semilla de diferentes clase de pono’y palo el ya siembra na provincia del Zamboanga del Norte, asegun con el Departamento de Medio Ambiente y Recursos Naturales, O DENR, del Jueves.
Asegun con el DENR, con el mga semilla de pono’y palo ya siembra del Miercoles na campus del Liloy Central School, na municipio de Liloy, Zamboanga del Norte.
El mga ya siembra pono’y palo compuesto de 30 semilla de Narra, 70 de Banaba, y 70 de Renguilla o suma total de 170 semillas.
Asegun con el DENR, con el mga semilla ya dale el Oficina de Medio Ambiente Comunitario y Recursos Naturales, o CENRO, del municipio de Liloy.
El mga participantes na siembrada de pono’y palo ya inclui mga voluntarios del gobierno municipal de Liloy, miembros de facultad del Liloy Central School, y Local Disaster Risk Reduction Management Office.
Asegun con el DENR, el actividad ya conduci en colaboracion entre el CENRO-Liloy y gobierno municipal del Liloy como parte del campaña de “Pagbabago Bags” que ta encabesa el Oficina Satelite de Mindanao Occidental del Vice Presidente.
Mientras tanto, el CENRO-Liloy, en coordinacion con el gobierno municipal del Liloy ta plaña ancha con el esfuerzos por medio de restoracion del landscape forestal y campaña de conciencia ambiental. (B. Garcia)