Ya anuncia el Philippine Drug Enforcement Agency (PDEA) cay tiene ya el total de 1,334 barangays el que limpio ya desde problema de droga illegal (drug-cleared barangays) aqui na Zamboanga Peninsula.
Ese el cosa cosa ya reporta el director rehyonal del PDEA, Laurefel Gabales, durante del implementacion del programa del BIDA or “Buhay Ingatan, Droga’y Ayawan” del Sabado aqui na rehyon que ya encabesa si Secretaryo Benjamin Abalos, Jr., del Departamento de Interior and Govierno Local o DILG.
El numero de barangays limpio ya desde droga ilegal y si onde lugar amo el maga sigueintes: Zamboanga del Norte, 554; Zamboanga del Sur, 512; Zamboanga Sibugay, 231; ciudad de Zamboanga, 20; y ciudad de Isabela, 17.
Asegun con Gabales tiene pa restante de 455 barangays el ta esta afectao na uso y bendida de droga ilegal aqui na rehyon.
Base na lista del PDEA, el probinsya del Zamboanga Sibugay el tiene de todo alto numbero de barangays que ta esta pa afectao na problema de droga ilegal.
El numero del maga barangays que ta esta pa afectao de droga ilegal y si onde lugar amo el maga siguientes: Zamboanga Sibugay, 146; Zamboanga del Sur, 116; Zamboanga del Norte, 88; Zamboanga City, 77; y ciudad del Isabela, 28.
Si Gabales ya habla cay tiene tamen el suma de 115 barangays aqui na rehyon el que certificao hinde afectao na problema de droga ilegal.
El entero rehyon de Zamboanga Peninula tiene el suma total de 1,904 barangays.
Asegun con Gabales cay ta continua pa ase el esfuerso del mga concierne agencias de govierno para limpia con el maga barangays ta esta pa afectao na problema de droga ilegal.
Myentrastanto, el programa de BIDA amo ta uni con el fuersa del todo agencias de govierno y diferentes sector del sociedad na peleya contra droga ilegal.
(News & photo courtesy by B. Garcia)