Onse miembros del Bangsamoro Islamic Freedom Fighters (BIFF) ya rindi na autoridad na provincia del Norte Cotabato, asegun con el militar del Martes.
Asegun con Major General Alex Rillera, comandante del 6th Infantry Division, el 11 miembros del BIFF ya rindi por causa del continuando ofensiva del 90th Infantry Battalion (IB) contra canila na Norte Cotabato.
Asegun con Rillera el 11 miembros del BIFF quien mga siguidores del faccion de kairalan ya rindi del Sabado na quartel del 90IB na Barangay Nicaan municipio de Libungan, Norte Cotabato.
El 11 miembros del BIFF que ya rindi ya entrega cuatro riple M-14 de sniper, un M-79 grenade launcher, dos riple Garand, tres Rocket Propelled Grenade launchers y dos uzi .9-millimeter submachine guns.
Asegun con Rillera el 11 miembros del BIFF que ya rindi ya pasa bajo el proceso de balidacion del “AFP-PNP Intelligence Committee” para puede sila recivi ayuda desde’l programa de Tulong ng Gobyernong Nagmamalasakit del Bangsamoro Autonomous Region in Muslim Mindanao.
Mientras tanto, asegun con Lieutenant General William Gonzales, el comandante del Western Mindanao Command (Westmincom) cay el rindida del 11 ta indica cay ta aserca ya el tumbada del grupo BIFF.
Si Gonzales ta llama con el mga restante miembros de BIFF para rindi pacificamente, principia un nuevo vida como un productivo miembro del sociedad y toma parte na ayuda de busca lavida del govierno.
(B. Garcia, photo courtesy of 90 Infantry Battalion)
