El 102nd Infantry Brigade (102Bde) ya inagura con el nuevo construido dos andanas cuartel para del mga personajes alistao del mando base na provincia del Zamboanga Sibugay.
Asegun con el 102Bde, con el cuartel ya construi na cuartel general del mando na Barangay Sanito, Ipil, el capital del provincia de Zamboanga Sibugay.
El moderno facilidad tiene el caracteristicas de salon de usos multiples, lugar de comedor centralizado con cocina y otro comodidades deseñao para mejora el condiciones de vida del mga personajes alistao del brigada.
El construccion del cuartel ya principa de 2020 bajo el iniciativa conjunta del Departamento de Defensa Nacional y Departamento de Obras Publicas y Carreteras bajo el programa de Tatag ng Imprastraktura para sa Kapayapaan at Seguridad (TIKAS), por medio del esfuerzos del antes Congresista Dulce Ann Hofer del segundo distrito del Zamboanga Sibugay y del antes comandante del 102Bde, Brigadier General Leonel Nicolas.
Mas temprano este año, el fondo para el complecion del proyecto ya puede obtene por medio de iniciativa del incumbente Congresista Antonieta Eudela del segundo distrito del Zamboanga Sibugay.
Ya recivi tamen valuable suporta el proyecto desde’l varias partes interesadas, incluido el Ingeniero Nonoy Pawaki, Gobernador Victor Yu del provincia de Zamboanga del Sur, y Gobernador Henry Oaminal del Misamis Occidental, de quien donaciones instrumental llevando con el proyecto en fruicion.
El de ila inquebrantable suporta, junto con el buen trabajo y dedicacion del mga tropas y milicianos del 102Bde y 1st Infantry Division (1ID), por medio el 1st Installation Management Battalion (1IMB), quien ya contribui de ila habilidades y trabajo, ya hace posible con el proyecto.
Si Brigadier General Elmer Suderio, el comandante del 102Bde, ya expresa su profundo gratitud con todo con aquellos quien ya contribui na realizacion del proyecto.
“Este cuartel es un testamento del inquebrantable suporta del de aton compañeros y partes interesadas,” si Suderio ya habla. (B. Garcia)