Un soldao y tres reservistas militar el ya iri na un accidente vehicular na carritera del Maria Clara Lorenzon Lobregat (MCLL) aqui na ciudad, asegun con el policia local.
Asegun con el policia local, el accidente ya ocuri na carritera del MCLL na Barangay Lubigan, en este ciudad.
El policia ya nombra con el irido soldao como si Technical Sergeant Allan Capol y mga reservistas militar como canda Dimple Divinagracia, Roel Bautista, y Ernesto Angga.
Base na investigacion del policia local, mga victima abordo na trak de militar que ta maneja si Laurence Roy Teves, 29 años el edad y un soldao, cuando ya man bangga na atras del trak el un bus de pasajero que ta maneja si Rodrigo Velasco, 52 años.
Ambos el trak y bus ta viaja para na direccion del Barangay Lubigan durante el accidente.
El mga pasajeros del trak militar ya iri por causa del fuersa de bangga y ya lleva canila na Cristino Paragas Memorial Hospital na Barangay Quiniput para el curada medical.
Asegun con el policia local, el compania del bus de pasajero ya conforma asumi el gastos na hospital del mga irido soldao y reservistas militar.
(B. Garcia)
Â
