Un persona el ya aresta y pusil sin licensia y droga ilegal el ya confisca mga autoridad na un operacion del aplicacion de ley na costa oeste del ciudad, asegun con el policia local del Viernes.
El policia local, ya nombra con el arestao persona como si Willy Francisco, 45 años el edad y residente del Barangay Maasin, 13 kilometros oeste del ciudad de Zamboanga.
Asegun con el policia, con Francisco ya aresta mga alas 3:37 del Jueves tarde na Sitio Cabigan, Barangay Maasin, en este ciudad.
Asegun con el policia, con Francisco ya aresta na un operacion de aplicacion de ley por medio na implementacion del un orden de buscada que ya dale el un corte local por violacion del Ley de Republica Numero 10591, conosido como el Comprehensivo Acto de Regulacion de Armas de Fuego y Bala.
Durante el aresto de Francisco, mga autoridad ya puede confisca un calibre .45 pistola con cuatro bala, un bolso bandolera, 3.97 gramos de suspechao shabu enpaquetao na tres sobrecitos que tiene el valor de P27,57, y parafernales de droga ilegal.
Asegun con el policia, con Francisco ya pone bajo’l custodia del Criminal Investigation and Detection Group para el propio disposicion. (B. Garcia)