El Armor Division del Philippine Army ya inicia cambio na liderato del First Cavalry Battalion (1CAV) base na provincia del Zamboanga del Sur province.
Asegun con el 1st Infantry Division, si Major General Facundo Palafox, IV, el comandante del Armor Division, ya encabesa con el ceremonia del cambio del mando del Miercoles na quartel del 1CAV na Barangay Upper Pulacan, Labangan, Zamboanga del Sur.
Durante el ceremonia, si Coronel John Mark Competente, formalmente ya entrega su posicion con Tiniente Coronel Romeo Gabor, con quien ya designa como el nuevo comandante del 1CAV.
Si Competente ya expresa su gratitud con el diferente sector del sociedad quien ya contribui y suporta mucho na acomplicimiento del mando durante su turno.
Ya rindi tamen gracias si Competente con el mga personajes del 1CAV por el de ila buen trabajo y contribucion na triunfo del mando.
Si Gabor ya expresa su gratitud con Palafox por el confiansa ya dale conele para servi como el nuevo comandante del 1CAV.
Si Palafox ya rindi gracias y ya felicita con el esfuerzos y buen liderato de Competente que ya lleva significante resulta na de ila mision. (B. Garcia, photo courtesy of 1st Infantry Division PIO)