Un 25 año persona el ya muri despues que ya sufri le tres irida de bala na diferente parte del cuerpo na un incidente del tiroteo na provincia de Basilan, asegun con el policia del Miercoles.
El policia ya nombra con el fatalidad como si Marsam Manuel, un residente de Barangay Kapatagan Grande, ciudad de Isabela, Basilan.
Asegun con el policia, con Manuel ya tira el un desconosido persona mga alas 3:20 del Martes tarde na residencia de Yasser Maalum na Purok 2, Barangay Menzi, ciudad del Isabela.
El anak de Maalum, si Alzam, ya informa con el policia cay apuera cuando ya uwi le tiro adentro del de ila casa.
Enseguidas si Alzam ya entra pa adentro del casa para chekia y ya puede le columbra con el suspechao ta corre pa apuera y ya escapa abordo na un motorsiclo.
Asegun con Alzam ya encontra le con Manuel acustao na posento del de ila casa y muerto ya.
El mga pulis ya recubri dos bala y tres capsula del calibre .45 pistola na lugar del crimen.
El policia del ciudad de Isabela to continua el investigacion para determina si cosa el motivo y si quien el echor del incidente.
(B. Garcia, photo courtesy of Ronda del Basilan)
