El mga autoridad ya aresta un persona por violacion del prohibicion de armas en las elecciones, o election gun ban, na ciudad de Cotabato, asegun con el policia del Lunes.
Asegun con Police Brigadier General Romeo Macapaz, el director del Police Regional Office-Bangsamoro Autonomous Region (PRO-BAR), ya identifica lang con el arestao persona como si alias Saud, de legal el edad y residente del Sultan Kudarat, Maguindanao del Norte.
Asegun con Macapaz, con Saud ya aresta na un checkpoint del Domingo na Barangay Tamontaka Mother, ciudad de Cotabato.
Asegun con Macapaz, el mga pulis ta conduci operacion de checkpoint cuando ya puede sila columbra un pusil adentro na vehiculo que ta maneja si Saud.
Asegun con Macapaz, ya aresta con Saud y ya confisca desde su posesion un pistola con un clip ta contene 10 bala, y un reserva clip con dos bala.
Si Macapaz ya comenda con el mga personajes del policia por el de ila esfuerzos, demostrando de ila inquebrantable dedicacion na seguridad del publico y paz y orden del periodo de eleccion na region autonomo.
Ademas, si Macapaz ya hace acorda con el publico cay el cargada de armas, bala, y componente de pusil como clip sin el propio autorizacion o exempcion ta dale el Comisiones del Eleccion es un infraccion grave durante el periodo de eleccion. (B. Garcia)Â