Zamboanga: 1 negociante muerto na incidente de tiroteo

0
9
photo courtesy by Remus Lim Ong

Un negociante de gulay el ya muri mientras nohay pasa nada con su esposa na un incidente de tiroteo aqui na ciudad de Zamboanga, asegun con el policia del Domingo.

El policia local ya nombra con el fatalidad como si Renante Eugenio Salazar, 38 años el edad. Nohay mas nombra el policia con el esposa de Salazar.

Asegun con el policia, el incidente ya ocuri mga alas 7:38 del Sabado denoche na carretera de circunvalacion na Barangay Pasonanca, en este ciudad.

Base na investigacion, si Salazar y su esposa ta serra ya con el de ila tienda de gulay cuando ya llega el dos desconocidos personas muntao na un motorciclo y derepente ya tira con el victima por muchas veses el ancas na motor.

Asegun con el policia, si Salazar ya sufri dos irida de bala y ya despidi mga alas 9:59 del Sabado denoche mientras bajo el curada medical na un privado hospital.

El policia ya habla, el mga suspechao ya escapa para na direccion del camino que ta conecta con el Barangay Tumaga y Barrio de Lunzuran.

Asegun con el policia, agravio personal el posible motivo del incidente.

Ta continua pa investiga el policia para identifica con el mga echor del incidente.

El incidente del Sabado denoche, amo el segunda vez que ya tira con Salazar mga desconocidos armao personas na mismo lugar del incidente.

El primero ya ocuri del Abril 22 este año, donde ya iri y ya libra si Salazar. (B. Garcia)

Leave a Reply