Un persona el ya muri y otro dos el irido na accidente vehicular envuelto dos motosiclo aqui na ciudad de Zamboanga, asegun con el policia local del Jueves.
Asegun con el Zamboanga City Police Station 7 (ZCPS7) el incidente ya ocuri mga 5:45 del Jueves aga na Barangay Sta. Maria, en este ciudad.
El ZCPS7 ya nombra con el fatalidad como si Danilo Fidel Martinez, con quien ya declara muerto el doctor cuando ya llega na hospital.
Con el dos irido ya conose como canda Reyhana Martinez Dela Cruz, 14, y si Samier Samsuya, asegun con el policia.
Base na investigacion, si Martinez ta maneja motorsiclo y ta sigi ancas si Dela Cruz cuando ya man bangga canila si Samsuya, quien ta maneja tamen motorsiclo.
Si Martinez ta bira pa isquierda para na calle De Leon, Barangay Sta. Maria, mientras si Samsuya ta maneja para na pueblo estaba na Barangay Pasonanca durante el incidente.
Ambos canda Dela Cruz y Samsuya admitido na hospital mientras destrosao el dos motrosiclo por causa na fuersa del Bangga-an. (B. Garcia, photo courtesy of ZCPS7)
