Catorce miembros del grupo Abu Sayyaf el ya rindi del Miercoles amediante del intensificao campaña contraterrorismo del 101st Infantry Brigade na provincia del Basilan.
Si Brigadier General Alvin Luzon, el comandante del 101st Infantry Brigade, ya presenta con el 14 estaba violente extremista con Major General Ignatius Patrimonio, el comandante del Joint Task Force (JTF)-Orion y el concurrente comandante del 11th Infantry Division, durante su visitada na Barangay Tabiawan ciudad de Isabela provincia de Basilan.
Aquellos quien ya rindi amo el mga siguientes: Absar Amana; Najer Lakibul; Etang Awal; Masber Hoben; Tot Awal; Omar Salim Awal; Omar Kabak; Rey Sakilan; Marjim Barillo; Hariya Palinta; Puran Abuhon; Aksan Mijan; Alias Ngut; y si Alias Matsur.
Ya entrega tamen sila 13 armas de fuego de alta calibre que ta inclui sinco rifle Armalite; un rifle M653; dos rifle M14; un rifle Garand; dos M-79 Grenade Launchers; y dos rifle KG9.
El 14 rendidores mga siguidores antes de Pasil Bayali, un lider del grupo Abu Sayyaf na Basilan.
Si Bayali ya muri por causa del mga irida ya sufri le na encuentro de mas temprano contra con el tropa del govierno, como parte del campaña sin descanso contra con mga Abu Sayyaf na isla del Basilan.
El voluntariamente rindida del 14 miembros del Abu Sayyaf ta dale mira cay tiene buen exito el colaboracion entre el govierno local, otros agencia de govierno, sector de securidad y el comunidad. (B. Garcia, photo courtesy of 101st Infantry Brigade)