Un persona el ya muri y otro uno el irido na un incidente de tiroteo na costa oeste del ciudad de Zamboanga, asegun con el policia local del Lunes.
Asegun con el policia local, el incidente ya ocuri mga alas 11:40 del Domingo denoche na Phase 4, Country Homes subidivision, Barangay Ayala, 16.5 kilometros oeste de este ciudad.
El policia ya nombra con el fatalidad como si Sheems Tayone, 32 años el edad y residente del Phase 3, Zone 8 Country Homes subdivision, Barangay Ayala, en este ciudad.
Con el irido ya nombra el policia como si Rodel Demayo, 42 años el edad y residente del Phase 2, Country Homes subdivision, Barangay Ayala.
Base na investigacion del policia, ta espera el mga victima con el de ila amigo cuando tiene tres desconsidos personas el ya averigua canila si cosa sila ta ase na calle del Phase 4, Country Homes subdivision.
Uno del tres suspechao, ya jala su pusil y repetidamente ya tira con Tayone mientras ya istindi si Demayo para na casa del de ila amigo y ya sabe le despues cay irido tamen ele.
Asegun con el policia, con Tayone ya declara muerto el mga personajes del servicio de emergencia medical quien ya responde na lugar del incidente mientras con Demayo ya lleva na hospital.
El policia ya recubri seis capsula de calibre .45 pistola na lugar del crimen.
El mga personajes del Zamboanga City Police Station 9 ta continua conduci investigacion para determina el motivo y el identificacion del mga suspechao del incidente. (B. Garcia, photo courtesy of Zamboanga City Police Station 9)