Zamboanga: 1 miembro de PCG irido na incidente de tiroteo

0
9
photo courtesy of PNP Basilan

Un miembro del Guardia Costera de Filipinas o Philippine Coast Guard (PCG) el ya iri y nohay pasa nada con su novia na un incidente de tiroteo na provincia del Basilan, asegun con el policia del Viernes.

Asegun con el policia, el incidente ya socede mga alas 5 del Jueves tarde na Sitio Calle Onse, Barangay Maligaya, ciudad de Lamitan, provincia de Basilan.

El policia ya identifica con el victima como si Nurhan Birong, 26 años el edad, y un residente del municipio de Akbar, Basilan.

Nohay mas nombra el policia con el novia de Birong con quien nohay pasa nada. Si Birong designao na mando del PCG na ciudad de Ormoc.

Asegun con el policia, si Birong y su novia ta camina na canto’y camino cuando ya tira conele por tres beses el un desconocido armao persona muntao na un motorciclo.

Con Birong enseguidas ya lleva na Lamitan District Hospital para el curada medical y el suspechao enseguidas tamen ya escapa.

El policia ta continua el conducida del invstigacion para determina si cosa el motivo y establisa el identificacion del suspechao del incidente. (B. Garcia)

Leave a Reply