El uno del dos suspechao na matansa de un oficial de barangay bajo ya ahora na custodia del policia, asegun con un alto oficial del policia del ciudad.
Si Police Colonel Alexander Lorenzo, el Zamboanga City Police Office director, ya nombra lang con el suspechao como un tal Villamor, 44 años el edad.
Del Deciembre 3, si Villamor personalmente ya aparece na Barangay Hall del San Roque hunto con cuantos del su parientes para clarifica cay hinde le envuelto na incidente de matansa de Serbelio Molina, 55 años el edad, el barrio capitan del Cawit.
Sin embargo, asegun con Lorenzo, con el suspechao ya identifica positivamente cuando ya presenta conele con el mga testigos na matansa del Molina, poreso enseguidas conele ya aresta.
Con Molina fatalmente ya tira mga alas 7:15 del aga del Deciembre 1 na calle de Zone 4, Barangay Cawit, 13.35 kilometros oeste del ciudad.
Si Molina ta maneja motorsiclo de camino para na barangay hall del Cawit cuando ya tira conele el uno del dos desonosidos armao persona muntao na otro motorsiclo que ya sigi na atras de victima.
Asegun con Lorenzo, ta continua de ila esfuerso para aresta con el otro suspechao na matansa del barrio capitan de Cawit. (B. Garcia, photo courtesy of Ronda Regino Delos Santos)