Ya aresta con un nativo del municipio de Pata, Sulu, y ya confisca P340,000 cantidad de suspechao shabu mga personajes del pulisiya local na un campanya contra droga ilegal aqui na ciudad del Zamboanga.
Si Police Major Wilfredo Palamos, el hefe del Zamboanga City Police Station 9, ya nombra con el arestao suspechao como si Marhaber Jamil, 25, un residente de Barangay Timuddas, Pata, Sulu.
Asegun con Palamos cay con Jamil ya aresta na un “buy-bust operation” mga alas 2 del Huwebes aga na Purok 2, Barangay Recodo, este ciudad.
Si Palamos ya habla cay ya puede confisca na posesion de Jamil poco mas o menos 50 gramos de suspechao shabu que tiene el valor de P340,000, un bundle del sien pedaso de P1,000 como boodle money que ya pone insima un verdadero P500 como markao sen, un paper bag, y un cellular phone.
Si Jamil detenido ahora na quartel del ZCPS9 na Barangay Ayala y esperansao planta formal asunto contra conele por violacion del Comprehensive Dangerous Drugs Act of 2002. (B. Garcia)