Un individual de alto valor suspechao el ya aresta y P1.8 millon cantidad droga ilegal el ya confisca mga autoridad na un operacion contra droga aqui na ciudad, asegun con el policia local.
El policia local ya habla con el arestao suspechao ya conose como si Bismal Sahibad, 25 años el edad y residente de Barangay Sta. Catalina, en este ciudad.
El mga operativas del policia ya aresta conel suspechao na un “buy-bust operation” mga alas 2:37 del Miercoles del aga na Purok 3-C, Barangay Sta. Catalina, en este ciudad.
Asegun con el policia, ya confisca na posesion de Sahibad mas or menos 270 gramos de suspechao shabu enpaquetao na sinco sobrecitos de plastico que tiene el valor de P1,836,000, un bag de cinturon, un balutan de 49 pedaso de P1,000 “boodle money” que ya pone insima in real P1,000 como el markao dinero.
Asegun con el policia, el buy-bust operation ya conduci contra con Sahibad despues que ya pone bajo el bisiada de suyu mga mal actividad.
Con el suspechao ya pone bajo el custodia del policia local en preparacion para el plantada del asunto contra conele.
(B. Garcia)
