Gidepensa karon sa Police Regional Office-12’s Anti-Cybercrime Unit ang gihimong warrantless arrest sa usa ka public school teacher dinhi sa GenSan, gumikan sa matod pa “seditious” niining post sa Facebook, Biyernes sa gabii.
Sa usa ka pamahayag, gipanghingusgan ni PNP-RACU-12 assistant chief, Major Leo Dofiles, nga makonsidera matod pang continuing crime ang gihimo sa suspek nga si Juliet Espinosa, 55-anyos ug residente sa Gensanville Subdivision sa Barangay Bula.
Si Espinosa ang giaresto gumikan sa iyahang post nga pagsulsol sa publiko nga sulungon ang Lagao Gymnasium, asa nabutang ang mga food supplies nga giaandam sa lokal nga panggamhanan alang sa relief operations.
Dugang pa ni Dofiles, maka-alarma ang maong post sa suspek gumikan sa ginaaghat niini ang publiko sa paghimo ug krimen.
Si Espinosa, nga usa ka magtutudlo sa Lagao Central Elementary School, ang naaresto sulod sa iyahang panimalay takna alas-8:00 na sa gabii sa mga tauhan sa kapulisan, human sa reklamong gipasangat sa City Legal Office.