Davao del Norte – Sugdan na sa Lokal nga Panggamhanan sa New Corella ang pag-scan sa mga Quick Response (QR) codes sa dili pa mosulod sa buhatan aron matala ang pagsulod sa indibidwal sa eksaktong oras ug lugar.
Tumong sa QRC scanning gamit ang Davao Del Norte COVID-19 Contact Tracing System (DCCTS) nga mas mapadali ang pagpanubay sa mga taong posibleng natakbuyan sa sakit nga COVID-19 kung ugaling adunay nag-positibo sa maong sakit sa gikatakdang lugar ug oras sulod sa probinsya.
Gipahibalo na ni Mayor Jorjan “Monet” B. Federiso ang mga kapitanes alang sa pagsugod sa QRC scanning sa ilang tagsa-tagsa ka-barangay.
“Dalahon gyud na ninyo pirme inyong QR code uban sa valid ID para maka-transact mo sa munisipyo,” awhag ni Mayor Monet sa publiko.
Gidapit usab sa mayora ang mga pribadong buhatan o establisyemento sa lungsod nga magpahigayon og DCCTS pinaagi sa pakig-alayon sa IT in-charge sa munisipyo.
“Katong wala pay QR codes, duol mo sa inyong kapitan o modiritso sa atong IT para sa activation. Wala ni bayad,” dugang ni Mayor Monet.
Ubos sa kamandoan nga gipagawas ni Kuya Gob Edwin I. Jubahib, gobernador sa DavNor, gipatuman na sa tibuok probinsya ang “No QR code, No entry” policy sukad niadtong Setyembre 15.
(Municipal Information Office/ OIC Michael Manguhig, RPN DXKT Davao)