CAGAYAN DE ORO CITY – Walay mga doktor ug medical personnel sa Northern Mindanao Medical Center, NMMC o bisan sa City Health Office ang girecruit nga madugang sa mga medical frontliners sa National Capital Region, matud pa sa mga local health officials dinhi sa syudad. Sa usa ka press briefing, gisugilon ni City Health Officer Dr. Lorraine Nery nga nakadawat siyag text message gikan kang Regional Director Adriano Subaan sa DOH-10 nga nagkonpirmars sa recruitment sa 5 ka doktor ug 15 ka mga nurses ug 3 ka medical technologists ngadto sa NCR. Apan kini sila nga kabahin sa DOH Doctors to the Barrios program nga mipalig-on sa COVID-19 response program nga pwede ra sila maredeploy.
Sa kabahin ni NMMC Liason Officer Dr. Bernard Julius Rocha, siya miiingon nga walay doktor o medical personnel ang girecurit gikan sa ilang ranggo sa DOH nga madugang sa mga medical frontliners sa Manila ug sa uban pang bahin sa NCR. Ang lakang sa DOH nahitabo tapos nanawagan ang medical groups ngadto kang President Rodrigo Duterte alang sa duha ka semana nga lockdown aron matabangan sila sa pagpreparar alang sa mga contingencies sa pagdumala unya sa pagtaas pag-ayo sa kaso sa Covid-19 cases. (City Information Office)