Giaprubahan karong adlawa sa gipahigayong committee hearing ni City Councilor Franklin Gacal Jr. kauban ang komitiba ni City Councilor Edmar Yumang ang pagwagtang sa gipatumang Sunday lockdown kon no movements sa mga tawo matag adlawng Domingo dinhi sa syudad ug kini giuyunan martud pa sa mga opisyal sa Local IATF kon Inter-agency Task Force.
Kumpirmasyon ni Kagawad Gacal sa iyang Facebook post karong hapon nga human sa maong konsultasyon nauyunan nga ipatuman ang pagwala sa lockdown matag adlawng Domingo sugod sa Bulan sa Disyembre kasamtangang tuig. Dungan usab nga naaprobahan ang pagpatuman sa curfew nga mag sugod ang oras niini alas dose sa tungang gabii ug hangtud alas kwatro sa buntag.
Kahinumduman nga dugay nang hangyo sa hut-ong sa mga negosyante gipangunahan sa GenSan Chamber of Commerce and Industry sa pagpangulo ni Brigada CEO Elmer Catulpos nga wagtangon na ang Sunday lockdown niining panahona ubos sa MGCQ kon Modified General Community Quarantine aron makagawas na ang mga tawo para motrabaho, mag negosyo ug molambo ang ekonomiya sa GenSan.
Susamang mga panawagan ang gihimo usab sa uban pang sector apan wala gilayon kini giuyunan sa Local IATF tungod sa nahitabong local transmission sa Covid-19 dinhi sa syudad.
Mao usab ang baruraganan sa mga health frontliners kon mga doctor pinaagi sa PMA kon Philippine Medical Association gipangunahan ni Dr. Fidel Peñamante tungod sa kabalaka nga molala pa ang sitwasyon sa Covid-19 sa GenSan ilabina ang pagkatakod lakip ang mga doctor ug nurses ug uban pang mga health frontliners. Gani misugyot pa kining ipailawom sa ECQ kon Enhance Community Quarantine ang syudad sa GenSan pero wala kini giaprobahan sa Local IATF tungod sa hisgutanan sa ekonomiya .
Gikalipay karon sa katawhan ilabina sa mga netizens ang maong latest development sa pagwala sa Sunday lockdown sa syudad sugod bulan sa Disyembre.
(Roniel Degorio, RPN DXDX GenSan)