Nagkakasararo an grupo ni dating Majority Floor leader Rolando Andaya Jr. nganing si Bise Presidente Leni G. Robredo iyo an magcandidatong gobernador sa maabot na eleksyon sa Mayo 2022 alagad nagpapadagos pa an urulay dawa mayo pang kumfirmasyon an bise presidente mantang naheheling kan grupo na pigcoconsiderar na maghuros siya sa posisyon lokal.
Sinda Andaya, diputado Arnie Fuentebella asin Alcalde Madel Alfelor kan Ciudad nin Iriga saindang pigmamawot an bise presidente magcandidatong gobernador.
Alagad sa pinakahuring pig-post sa social media ni VP Leni sa halipot kaining mensaje wish niya si Andaya iyo an magcandidatong gobernador.
Sa press conference na ginibo sa Primus Hotel sa Brgy. Pacol, Ciudad nin Naga kan Domingo, Pebrero 7 na pinangenotan ni dating diputado Andaya kan premir distrito, sinabi kaini na liwat siyang macandidatong congresista sa premir distrito asin an saindang naheheling nganing tambodan iyo si VP Robredo.
Nakasulot nin T-shirt si Andaya na may imprenta sa likod ‘‘Wish ko Leni for Governor’’ an paliwanag kaini sa media dai siya magamit kun mayong paaram ki Robredo.
Sa mga pahayag man ni diputado Fuentebella kan Partido district sa suhay na entrevista kan media, kan hapoton ini kun puede nindang makumbensir si VP Leni iyo an magiging candidato nindang gobernador an saiyang simbag ‘‘dawa mayo pang pinal na urulay sa satuyang candidatong gobernador, but the truth is hopeful and we are very lucky na even si VP Leni is considering running sa cargong gobernador digdi sa Camarines Sur.’’
Maging si Alcalde Alfelor na last termer bilang alcalde kan Ciudad nin Iriga asin posibleng magcandidatong congresista sa Rinconada district, sinabi kaini na saindang pigcoconsiderar si Robredo magdalagan sa Camarines Sur.
Igwa nang inisyal na urulay sinda ni Robredo alagad hinahalat pa an pinal na desisyon kan VP.
Antes nag-atubang sa media nagkaigwa muna nin miting si Andaya sa mga kaalyadong congresista, alcalde, bise alcalde, consejales asin mga vocal maging si nagtuwad nang alcalde asin vocal hale sa grupo ni Gobernador Migz Villafuerte.
An mga alcalde asin iba pang kaalyado ni Andaya na presente sa miting nagtutubod na an bise presidente madesisyon man giraray pabor sa pagdalagan gobernador.
An kampo ni Robredo maging si Congresista Gabby Bordado kan tercer distrito kan Camarines Sur dai paman napaluwas kan saindang reaksyon kun dapat magbaba na sa provincia an bise presidente.
An kampo kan mga Villafuerte an saindang candidatong gobernador iyo si Lougi Villafuerte tugang kan paluwason nang gobernador na macandidatong congresista sa Rinconada district.
(Melvin Barayoga, RPN DZKI Iriga OIC)