Un proyecto de casa nombrao como el “Vinta Residencia”, que ya implementa bajo’l programa de Pambansang Pabahay Para sa Pilipino (4PH) hay construi na Barangay Salaan, ciudad de Zamboanga.
Este ya vene despues que el Alcalde John Dalipe, Secretario Jose Rizalino Alcuzar del Departamento de Asentamientos Humanos y Desarollo Urbano, y si Cesar Bazan, hefe del Pag-IBIG del departamento de Davao, ya firma un memorando de acuerdo o memorandum of agreement (MOA) para el construccion del primer proyecto de casa del 4PH na ciudad de Zamboanga.
Si Dalipe ya alaba con el evento como un haciendo historico que hay transforma con el mga vida del mucho vivientes na ciudad de Zamboanga.
“Este firmada del MOA es un simbolo del de amon resolucion colectiva para construi un ciudad resiliente, inclusivo, y progresivo,” si Dalipe ya habla.
Antes del tripartita firmada de MOA, si Dalipe ya firma tamen MOA con el Metro Stonerich Coporation que ta encabesa si Hadji Ibrahim Nuño, quien hay construi con el mga estilo de condominio casa.
Asegun con Alcuzar, el programa de 4PH es un programa emblematico de vivienda del administracion Marcos intendido para ayuda resolve con el trabajo de atraso de casa na entero pais.
El Vinta Residencia ay tene 6,400 unidades residencial na ocho edeficio de 12 andanas y ocho del 14 andanas na 14.45 hectaria propiedad.
Cada un unidad residencial tiene el anchor de 27 metros quadrado con dos posento, sala, comedor, y escusao. Cada un edeficio tiene tres ascensores. (B. Garcia)