Nakatala na usab ang lalawigan sa Zamboanga del Norte sa lain pang community transmission sa makalisang nga COVID-19, hinungdan nga gipailawum karon sa 24-hr temporary lockdown ang usa ka subdivision sa lungsod sa Polanco nga mao ang Victoria Country Homes.
Nasayran nga usa ka lumulupyo niini ang nagpositibo sa Covid-19 nga gihinganlang Patient 054, usa ka 24 anyos nga babaye ug anaa nagpuyo sa naasoy nga subdivision.
Matud pa nga si Paient 054, walay travel ug exposure history rason nga gikonsiderar kini karon nga lain na usab nga community transmission.
Subay usab sa health protocols nga gisunod sa Local IATF, gimando sa chairman niini nga mao usab ang Mayor sa Lungsod sa Polanco nga si Mayor Evan Hope Olvis, nga ipailawum una sa lockdown ang VCH aron mas mapadali ang gipahigayun nga contact tracing, disinfection, lakip na usab ang containment sa tanang nahinagbo o nakauban sa maong pasyente.
Nagsugod ang maong lockdown sa VCH, Obay, Polanco kaganinang 1:00 PM, September 30, 2020, hangtud pagkaugma, October 1, 2020, 4:00 PM.
Andam na usab ang mga ayuda gikan sa munisipyo sa naasoyng lungsod aron ikaabag sa mga nanag-unang panginahanglanon sa mga residente sa maong subdivision.
(Polanco Rural Health Unit/ OIC Lyza Bautista, RPN DXKD Dipolog)