Cebu City – Nasikop na sa National Bureau of Investigation o NBI-7 ang usa sa mga suspetsado sa pagpusil-patay ni Atty. Joey Louis Wee niadtong Nobyembre 23.
Duha ka semana gikan sa pagbuno sa abogado sa gawas sa iyang opisina sa brgy. Kasambagan, Cebu City, nasignit sa NBI-7 ang usa sa upat o lima ka responsable sa krimen.
Mao kini gitug-an ni Director Renan Oliva sa mga sakop sa media kagahapon.
Suma pa ni Oliva, ila nang gihikay ang mga dokumento sa kaso batok sa dinakpan nga si Edgar Peralta.
Ang video sa closed-circuit television o CCTV camera duol sa nahitaboan mihatag kanila og abag sa pag-ila sa responsable.
Agig reaksyon, gihangop sa Integrated Bar of the Philippines o IBP-Cebu City Chapter ang kalamboan sa kaso.
Suma pa sa presidente sa Chapter, Regal Oliva, nalipay siya sa maong kaugmaran ug nanghinaot nga mahatagan na og hustisya ang gidangatan sa manlalaban.
Naglaom usab ang  IBP nga mataral sa hukmanan ang ubang mga makasasala.
(Jhon Tadlip/JTY, photo courtesy of WLS Law Firm)
(Source: NBI-7)