Usa na usab ka Philippine eagle ang na-retrieve sa probinsya sa Sarangani partikularminte sa lungsod sa Maitum. Na-rescue kini sa kalasangang bahin sa Salagbanog Falls sakop sa Barangay Ticulab, Maitum, Sarangani Province.
Kini nagpamatuod nga nagpabilin pa ang lasang sa Maitum, lakip na sa Kiamba ug ubang parte sa munisipyo sa Maasim isip kabahin sa Mount Busa complex. Niaging mga bulan, may nakita pud ang team sa DENR-CENRO Kiamba nga mga agila sa Maitum area.
Ang maong Philippine eagle ang nakaplagan sa residente nga si Mang Ganang, 43 anyos, samtang gatinguha nga tukbon ang unggoy niaging adlaw nga Byernes, Enero 8, mga alas dos sa hapon (2pm). Sa pagkaidlas sa unggoy, na-trap kon nasangit kini sa mga tunukon nga mga tanum sa rattan hinungdan nga wala na kalupad ang agila. Naila ang mga Philippine eagle nga monkey-eating eagle.
Dali nagpabalo si Ganang sa tribal leader nga si Chieftain Fredimen Wanan. Ila usab gipabalo ang opisina ni Maitum Mayor Alexander Bryan Reganit hinungdan nga napanaog kini Sabado sa buntag sa team sa MENRO Maitum sa buhatan ni Nannette Nacional kuyog ang Kabalikat Civicom-499 Maitum Chapter.
Hinanaling gi-contact sa LGU Maitum, DENR-CENRO Kiamba ug ECPC Sarangani (Environmental Conservation and Protection Center) nila Executive Director Kido Ramirez ug In-house Veterinarian Doctor Roy Mejorada ang dugay na nga partner nga Philippine Eagle Foundation naka-basi sa dakbayan sa Davao.
Tuod man, atong Sabado sa hapon, Enero 9, malampuson kining na-turnover sa CENRO Kiamba sa pagpanguna ni Mr. Edgar Calderon ug ECPC Sarangani. Gidawat kini nila Doctora Ana Lascano ug Adriano Oxales, ang veterinarian ug ang animal keeper sa Philippine Eagle Foundation.
Segun ni Dr. Mejorada, sutaon sa Philippine Eagle Foundation kung wala kini balatian pinaagi sa blood testing ug X-ray. Obserbahan ang tanang aspeto una kini hingpit ibalik sa kalasangan sa Maitum, sama sa gibuhat kang Sarangani Pride. Butangan usab kini og transmitter aron may tracker ug ma-monitor ang iyang kalihukan.
Anaa kini sa 3.9 kilos, daw pabo ang iyang gidak-on, gibana-banaan nga anaa sa lima (5) ka tuig ang pangidaron.
Upat (4) na ka higayon nga adunay Philippine eagle na-rescue sa probinsya sa Sarangani, usa si Sarangani Pride atong tuig 2017 nakit-an sa Barangay Batian, Maitum. Duha (2) ka agila napud ang nakita sa may Maasim gikan 1990s.
Deklarado na sa Sangguniang Panlalawigan nga usa ka Local Conservation Area (LCA) ang Mount Busa complex tungod walay laing tumong ang DENR ug ang Sulong Kalikasan program ni Governor Steve Chiongbian Solon kauban sila Senador Manny ug Congressman Ruel Pacquiao, Vice Governor Elmer De Peralta, tanang board member hilabi na si Board Member Irish Arnado sa SP Committee on Environment, ug mga mayores kundili ma-protektahan ang nahabiling lasang ug mga wildlife.
Pambansang Ibon sa Pilipinas ang Philippine eagle. Padayon kining giatiman sa gobyerno tungod pipila na lang kanila ang nabilin.
Matud pa ni Executive Director Ramirez, daghang mahitabo karon nga mga lakang nga mag-preserba sa Mount Busa tungod nahan-ay ug nahatag na sa opisina ni Governor Solon ang framework sa management plan para sa Mount Busa, kaabag ang Protect Wildlife nga gipondohan sa USAID o United States Agency for International Development sa nasud Amerika. (Source: Provincial Information Office – Sarangani)