Usa ka gikatahong negosyante nanimuyo sa dakbayan sa Pagadian, maoy tag-iya sa usa ka Ford Raptor, kolor orange, nga gikatahong gistrafing sa wala pa matino nga suspetsado kagahapon sa buntag, Pebrero 23, 2025 mga alas 8 kapin kon kulang, diha partikularmente sa dalan Zamora kanto Calibo St.Biasong, Dipolog City.
Ang maong sakyanan gipanag- iyahan sa usa ka GURPREET SINGH, 40 anyos, taga Alta Tiera, Tiguma, Pagadian City, usa ka negosyante ug magbisitahan dinhi sa Dipolog matag Dominggo sa pagtambong ug prayer meeting diha sa Punjab Variety Store nga anaa gapatigayon sa barangay sa Biasong ning syudad.
Matud pa sa inisyal nga imbestigasyon sa kapolisan,nga gipahigayon ni PSSG Hermes Cortes, matud pa sa tag- iya nga giparada sa niya ang iyang sakyanan nga 2025 Ford Next Gen Raptor 4×4 color orange sa maong dalan, sa sayo sa kabuntagon mga alas 6:45, ug sa pag abot sa alas 8 kapin kun kulang, usa ka wa mailhing lalaki nga nagtakuban nga nagsul-ob ug orange jacket ug sakay sa usa Honda Click MC, kolor itom, nga adunay Ice Cream Box sa unahan, ug adunay utility box sa likod nga bahin ang daling mingluthang sa maong sakyanan nga nakaparada lang sa daplin sa dalan.
Matud pa sa taho walay gikabutyag nga naangol sa hitabo ingon man nakalasan sa kinabuhi. Ang maong sakyanan lamang ang target sa pagpamusil sa mamumuno.
Sa pagkakaron ang mga kapolisan nagpahigayon na ug hot pursuit operation sa maong suspetsado, diin sakay kini sa motorsiklo nga click kolor itom. Ang mga otoridad kinsa gapahigayon dayun ug check point apil na ang ubang sakop sa kapolisan probinsiya alang na sa pgsikop sa maong suspetsado. (Angelica T. Obina)
(Source: PNP SPOT REPORT)