CAGAYAN DE ORO CITY- Aron masiguro nga adunay available nga barato nga pagkaon alang sa tanan, ang Department of Agriculture-10 nagpadayon sa ilang pagpang-apod-apod sa mga binhi sa utanon ngadto sa agriculture office sa Cagayan de Oro. Ang maong mga binhi ipang-repack sa maong opisina ug dayon ipanghatag sa mga residente aron sagupon ang urban gardening dugtong ning nahitabo sa krisis sa Covid-19.
Maoy mitunol sa mga vegetable seeds si Regional Technical Director for Operation Carlota Madriaga ug Provincial Operations Center Chief Nilda Salas ngadto sa Agricultural Productivity Office ubos sa lokal nga kagamhanan nga representahan ni Administrative Officer Marie Nathalie Dulla.
Gipasabot ni Madriaga nga dili na kinahanglan pa nga moadto sa merkado ang katawhan kon mahimo na silang makapatubo sa mga utanon sa ilang tugkaran ilabi na ning panahon sa kwarantina.
Nasayran nga ubay-ubay na ang natunulan sa maong mga binhi ug daghan na usab ang naka pahimulos sa abot sa ilang pananom.