CAGAYAN DE ORO CITY- Gikonpermar ni Cagayan de Oro City Epidemiologist Dr. Joselito Retuya nga ang tanan nga nahalubilo sa namatay nga pasyente nga nagpositibo sa coronavirus disease sa sitio Pinikitan, barangay Camaman-an ang gimonitor na nila pag-ayo. Dugtong niini nga kalambuan, ang pamilya sa namatay anaa na karon sa isolation unit ug padayon na sa kwarantina. Hinuon, wala silay nakita nga mga sintomas sa pamilya sa namatay sa Covid-19 patients.
Gitin-aw ni Dr. Retuya sa pikas bahin nga ang doktor ug sekretarya sa Sabal Hospital nga nakahandle sa nagpositibo niadtong Abril 10 nga walay unusual nga sintomas nga ilang nakita niini ug padayon gihapon nilang gimonitor.
Samtanga gibutyag sa maong epidemiologist nga adunay duha ka nurses karon sa usa ka pribadong hospital adunay close contact sa nasangpit nga Covid-19 patient ang giadmit karon sa tambalanan human nakasinati sa ubo ug asthma. Gikuhaan na kini sila sa swab test ug gipaabot na lamang ang resulta.
Sa pagkakaron, naningkamot gayod ang DOH sa pagpakitambayayong sa City Health Office aron madeterminar kinsa pa ang infected sa maong makamatay nga sakit.