Cebu City – Padayon pang giila sa kapolisan sa Compostela, Cebu ang upat ka patayng lawas nga gilubong sa Sitio Bago, Brgy. Cogon gahapon sa buntag.
Nahinabi sa mga reporter, si Capt. Vincent Zozobrado, hepe sa Compostela Police Station, miingon nga ilang napalgan ang mga patayng lawas dihang ang usa ka lalaki nga nangitag tanom sa lugar nakatimaho og patay.
Giabot og pagduda ang tawo pagkamatikod sa nakubkob o naukay nga bahin sayuta sa dapit.
Matod ni Zozobrado, nagtuo ang lalaki nga adunay gilubong sa yuta kay lain nakaayo ang iyang nasingo.
Dihang nahiabot ang mga polis, ila dayong gikuykoy hangtod naugkat ang upat ka patayng lawas ngaa duna lay gilay-ong sa paglubong nga tagsa ka metro.
Tulo saupat ang klaro nga lalaki samtang ang usa nga nakalabera na, lisod nang ilhon ang gender.
Suma pa ni Zozobrado, nagpasabot kini nga dili dungan ang paglubong sa mga minatay.
Hangtod sa paghipos ning balita, padayon pang gisubay sa kapolisan ang ngan sa mga biktima ug gani, nakiglambigit na sila sa silingang mga barangay. (Jhon Tadlip/JTY)
(Source and Photo: Compostela Police Station)
