Nanawagan karon ang buhatan sa panglawas sa probinsya sa Sarangani nga sama sa pagsuporta sa katawhang Sarangan sa nakalabay nga pagbakuna batok polyo, mao usab ang gilauman nga suporta sa karon nga ipahigayon nga pagbakuna sa mga kabataan singko anyos paubos – 9 months to 59 months old – aron padayong mabatukan ang sakit nga measles kon tipdas ug ang rubella.
Sa send-off program kagahapong adlawa, adlaw nga Martes, kauban ang mga personahe sa buhatan ni DOH XII Regional Director Aristides Tan, gibutyag ni Doctor Arvin Alejandro, ang provincial health officer, kuyog sila Immunization Coordinator Nurse IV Razel Bustria ug Alabel Municipal Health Officer Dr. Honorato Fabio, nga karong Oktubre 26 paingon Nobyembre 25 mahitabo ang MR-SIA o Measles-Rubella Supplemental Immunization Activity sa tibuok Pilipinas.
Luwas kini sa mga kabalaka tungod dugay na kining gibuhat sa DOH sulod na sa sobra kwarenta (40) ka tuig gikan tuig 1970s. Paningkamutan usab kini nga luwas sa hulga sa Coronavirus tungod tanang safety protocols ang ipatuman.
Gipamahayag ni Board Member Irish Arnado, chairperson sa SP Committee on Health, nga sa nakalabay nga pagbakuna, aduna silay gihatag nga flu vaccine sa mga health worker panigurado nga luwas duolan ang mga bakunador. Padayon matud pa sila sa Sangguniang Panlalawigan sa mga kaubanang board member ug ni Vice Governor Elmer De Peralta nga naka-alalay sa mga kalihukan sa Sulong Kalusugan program ni Governor Steve Chiongbian Solon, sa pag-ayuda usab nila Senador Manny ug Congressman Ruel Pacquiao, pito (7) ka mayor ug sa mga barangay kapitanes.
Gipaniguro pud ni Dr. Alejandro nga mapatuman ang dos metros (2m) physical distancing samtang gabakuna ug ang tanan ang mag-face mask ug face shield. Kung mahimo, hubuon ang gipangsuot ug maligo una musulod sa panimalay gikan sa health center.
Gipaklaro ni Dr. Alejandro nga walay house-to-house nga pagbakuna sa kini nga measles-rubella immunization kundili mahitabo ang pagbakuna sa mga health center ug mga health post sa kabarangayan.
Kumplikasyon sa mga balatian nga pwedeng ikamatay sa bata kung dili kini mabakunahan kontra tipdas ug rubella. Halos magka-pareha ang ilang sintomas nga adunay red rashes sa panit ug virus gihapon ang hinungdan.
Suportado ang Measles-Rubella Supplemental Immunization Activity magsugod karong Oktubre 26 sa dugay ng health partners nila Governor Solon-PHO Sarangani, sama na lang sa KCC Mall of Gensan Foundation, Save the Children, Mahintana Foundation, Red Cross, Sarangani Energy Corporation, Family Planning Organization of the Philippines, Philippine Nurses Association ug ang Sarangani Provincial Police Office.
Samtang, sa pikas nga bahin, nadawat na sa mga kwalipikadong senior citizen sa Sarangani Province, nakauna ang mga taga-Barangay Lumasal, Maasim, ang ilang second semester social pension gikan sa DSWD tag-P500 ang matag bulan para Hulyo hangtud Disyembre karong tuiga.
Gikalipay kini sa mga katigulangan ug ilang kabanay aron maka-ayuda sa mga galastuhan hilabi na nga nagpadayon pa ang mga border lockdown ug community quarantine. Una ng nagpasalamat sila Governor Solon ug DSWD XII Regional Director Cezario Joel Espejo tungod sa maayo nga partnership. Naka-schedule ang pagpanghatag sa ubang munisipyo sa Sarangani Province. (Provincial Information Office – Sarangani)