Cebu City – Pormal nang gisubhan ug gibuksan ang unang tulo ka andana sa bag-ong building sa CCMC o Cebu City Medical Center kagabii.
Tungod niini, manawat na og pasyente ang maong tambalanan sugod karon.
Gianunsyo usab sa kadagkoan sa siyudad nga ang OPD o outpatient department sa CCMC mo-operate sugod karong alas 8 sabuntag.
Suma pa ni Mayor Edgardo Labella, nakahukom siya pag-abli og una sa OPD gikan sa tanang departments ug wings sa CCMC aron moluag-luag ang mga pasyente nga naadmit sa karaang CCMC ngaatbang lang sa bag-o.
Matod ni Labella, ilang hinay-hinayan pagpalihok ang CCMC ug karong pipila ka adlaw, hayan magamit na ang emergency room ug ubang wings ug departments sa tambalanan.
Sa iyang bahin, si Yvonna Cania, CCMC administrator, miingon nga ang OPD sa bag-ong CCMC maka-accommodate og gikan sa 250 ngadto sa 300 ka tawo.
Sa nasayran, gisugdan pagtukod ang bag-ong CCMC nga adunay napu ka andana niadtong2015.
Gitiwas pagguba ang karaang estraktura pagka 2014 dihang nangliki kini tungod sa linog niadtong 2013 kansang epicenter nahimutang sa Bohol.
Ang bag-ong tambalanan nakasugat usab og kontrobersiya tungod sa nasinating kalangay sa construction niini. (Jhon Tadlip/JTY, photo courtesy of Edgar Labella’s Facebook page)
(Source: Cebu City Public Information Office)