Un persona sin trabajo y listao como un “street level individual (SLI)” ya aresta el mga pulis na campanya contra droga ilegal aqui na ciudad de Zamboanga. Asegun con Police Major Sonny Boy Perez, el hefe del Zamboanga City Police Station 6 (ZCPS6), cay con el arestao SLI suspechao ya conose como si Jesus San Luis, 25, de edad y un residente de Barangay Mampang, este ciudad. Asegun con Perez con San Luis ya aresta na un “buy-bust operation” mga alas 3:19 Lunes aga na calle Don Alfaro, Barangay Tetuan, este ciudad. Si Perez ya habla cay ya puede confisca na posesion de San Luis mas o menos dos gramos de suspechao shabu con el valor de P13,600, un porta moneda, y P200 markao sen conpuesto de dos P100 “bills”. Si San Luis bajo ahora na custodiya del ZCPS6 en preparacion para el plantada del formal asunto encontra conele. (B. Garcia, photo courtesy of Zamboanga City Police Station 6) Zamboanga: Trabajante de construccion irido na incidente de puñalada

Irido el un trabajante de construccion na un incidente de puñalada na costa iste del ciudad de Zamboanga.

Asegun con Police Major Benzar Bairulla, el hefe del Zamboanga City Police Station 3 (ZCPS3), con el victima ya conose como si Nelson Eter, 32 años el edad y residente de Barangay Talon-Talon, este ciudad.

Asegun con Bairulla el incidente de puñalada ya ocuri mga alas 10:20 Domingo denoche na Sitio Muti, Barangay Tolosa, na costa iste del ciudad.

Base na investigacion cay antes del incidente, si Eter y su mga compañeros na trabajo canda Rowel Ramillano y Jason Ramillano ta man tomahan na un tienda.

Asegun cay cuantos minutos el ya pasa, ya llega el suspechao, si Ariel Atilano, 33, años el edad y ya man hunto canila man tomahan.

Mga alas 9:40 Domingo denoche, si Eter y su mga compañeros ya decidi ya bolbe. Ta esta na atras del casa que ta construji sila na Sitio Muti, Barangay Tolosa.

Mas del investigacion, asegun, si Atilano ya lansya con Eter sin provicacion myentras de camino sila pa bolbida.

Con Eter ya lleba na Mindanao Central Santarium para el curada medical myentras si Atilano ya escapa.

Ta ase enbuscada ahora el mga personajes del ZCPS3 Atilano. (B. Garcia, photo courtesy of Zamboanga City Police Station 3)