Cebu City – Gipahibawo sa kadagkoan sa panglawas sa dakbayan sa Sugbo nga ang ubang edaran nga nabakunahan gipang-high blood o misaka ang blood pressure.
Hinuon, gitataw ni Dr. Jeffrey Ibones, acting city health officer, dili angayng kabalak-an ang maong epekto.
Matod ni Ibones, kadaghanan sa mga gi-high blood mao kadtong na-diagnose nga adunay high blood pressure.
Pero giangkon sa CHO nga wa pa nila masipong ang record sa mga senior citizen nga nakasinati og pagsaka sa BP.
Suma pa ni Ibones, wa pa siya makabati og edaran nga walay comorbidities.
Sagad sa maong mga edad naa na gyoy sakit-sakit diin ang uban mosaka ang high blood kay nakalimot pag-inom daan og tambal o gikulbaan.
Gitataw ni Ibones nga walay usa sa kapin sa 600 ka seniors nga nabakunahan niadtong Lunes batok sa covid 19 ang nakasinati og seryosong side effects.
Midugang si Ibones nga nagmatngon sila sa pag-atiman sa mga edaran nga mao na usay gi-schedule nga bakunahan.
Pag-abot nila sa vaccination site, ipaubos ang mga senyor sa assessment aron masusi ang ilang vital signs ug pagseguro nga sila himsog.
Kagahapon nabakunahan batok sa covid 19 ang ubang sakop sa konseho sa dakbayan sa Sugbo.
Gihimo kini sa mga opisyal aron pagdasig sa uban sa pagpabakuna.
Pipila ka mga Opisyal na bakunahan
Lakip sa nagpabakuna mao si Vice Mayor Michael Rama ug mga konsehal, Leah Japson, Joy Augustus Young, ug Raul Alcoseba, Jr.
Isip usa ka senior citizen, si Rama miingon nga mas maayong pangulohan sa konseho ang vaccination program aron kadtong mga senyor nga nagduhaduha pa, madasig sa paghimo sa ingon.
Suma pa sa mga sakop sa konseho, walay mitumaw nga problema human sila bakunahi ug ang ilang vital signs nagpabiling normal.
Si Konsehal Alcoseba miingon nga luwas ang vaccine ug wala siyay nabatyagang adverse effects.
Sa iyang bahin, si Japson, nga nahadlok sa dagom, mipadayag nga minimal ra ang kasakit ug paspas kaayo ang procedure.
Samtang si Konsehal Young miagni sa publiko ilabi na sa mga edaran sa pagparehistro sa vaccination aron mahilayo sa risgo sa covid 19. (Jhon Tadlip/JTY)
(Source: Cebu City Health Office, photo courtesy of Cebu City Public Information Office)