Cebu City – Aprobado na sa ikatulo ug kataposang pagbasa ang balaodnon ni Kong. Paz Radaza sa bugtong distrito sa Lapu-Lapu City nga magdeklarar sa matag April 27 nga special non-working holiday sa tibuok nasod.
Base sa press statement, si Radaza miingon nga ang House Bill 8897 nga nagdeklarar sa matag April 27 nga Pista opisyal sa nasod tungod sa kasaulogan sa Kadaogan sa Mactan nga tawgon og Lapu-Lapu Day o “Adlaw ni Lapu-Lapu,” giaprobabhan sa Kongreso niadtong Marso 16.
Nanghinaot si Radaza nga ang iyang balaodnon mamahimo nang hingpit nga balaod sa di madugay.
Mipasalig pa ang magbabalaod nga maningkamot siya pagpanday og mga balaodnon nga makaayo sa mga taga Lapu-Lapu.
Kon mahinumdoman, ang R.A. 11040 nga giaprobahan niadtong 2018, nagdeklarar sa April 27 isip Special Working Public Holiday sa nasod ug Special Non-working Holiday sa Lapu-Lapu, aron paghandom sa kadaogan ni Datu Lapu-Lapu.
Nagpasalamat si Radaza sa iyang mga kauban sa Kongreso nga misuporta sa iyang balaodnon.
Karong April 27, saulogon sa nasod ang ika-500 nga anibersaryo sa Kadaogan sa Mactan.
(Jhon Tadlip/JTY)
(Source: Cong. Paz C. Radaza, photos courtesy of National Quincentennial Committee | House of Representatives-18th Congress)