Kalipay ang gibati sa mga myembro ug mga namunoan sa tulo ka mga kooperatiba sa lalawigan sa Misamis Oriental human sila nakadawat og financial assistance gikan sa panggamhanan sa Misamis Oriental ubos sa liderato ni Governor Bambi Emano.
Atol sa gipahigayong virtual nga pagpakayab sa nasudnong bandila niadtong adlaw nga Lunes, Pebrero 8, ning tuig, usa sa nahimong highlight ang pag turn-over sa pang-gamhanan sa probinsya pinangunahan ni Governor Bambi uban si Board Member Atty. Michele Anayron kinsa maoy Chairperson sa komitiba sa kooperatiba, ug si Provincial Cooperative Officer Mr. Alberto Acain.
Nakadawat ang Association of Concerned Tugasnon- Comprehensive Rural Economic Sector kun ACT-CRES Credit Cooperative og ₱ 150,000.00 isip Augmentation Capital sa ilang Lending Activity.
Midawat sab ang Salubsob-Campo Marketing Cooperative og kantidad nga ₱ 150,000.00 alang sa dugang nga kapital sa ilang Wholesale and Retail of General Merchandise Project samtang ang Calubo Agrarian Reform Farmer’s Cooperative nakadawat og ₱ 200,000.00 financial assistance isip dugang kapital sa ilang Consumer Store nga magsilbing Wholesale Center sa ilang Barangay.
Sa kinatibuk-an moabot tunga sa milyon ang natunol sa Kapitolyo Probinsyal alang sa tulo ka mga kooperatiba.
Mapasalamaton nga gidawat nila ni Mr. Elmer Ubay-Ubay, Chairman sa ACT-CRES Cooperative, Ms. Rosita Olmillo, Chairwoman sa Salubsob-Campo Marketing Cooperative, ug si Ms. Delia Zarate, Chairwoman sa Calubo Agrarian Reform Farmer’s Beneficiaries Multi-Purpose Cooperative ang financial assistance nga gihatag sa pangamhanan ngadto kanila gumikan kini magsilbing dakong tabnag sa pagpauswag sa panginabuhian sa ilang mga myembro hilabina karon taliwala sa pakigbatok sa Covid-19 pandemic.
Dungan sa pagtunol sa financial assistance mao ang paghatag sab ni Governor Bambi og P74,000 ngadto kang Ms. Illuminada N. Saburao, kinsa maoy President sa League of Cooperative Development Officer of Misamis Oriental. Tinuig kini nga honoraria sa 20 ka mga MCDOs/CCDOs ug 17 ka mga MCDCs/CCDCs.
Ang pagtunol og ayuda sa matag kooperatiba sa lalawigan dili mahimo nga posible kung dili tungod sa kinasing-kasing nga panglantaw ni Governor Bambi Emano nga mahimong magmalambuon ang matag kooperatiba inubanan sab sa suporta sa myembro sa mayoriya sa Sangguniang Panlalawigan, rason nga ang probinsya sa Misamis Oriental maoy giila sa Cooperative Development Authority Region 10 isip nag-unang pinaka-aktibo nga buhatan sa kooperatiba sa tibuok rehiyon.- (Provincial Information Office – MisOr)
