Gitakboyan sa coronavirus disease o Covid 19 si Talisay City Mayor Gerald Anthony “Samsam” Gullas.
Sa iyang Facebook, gibutyag ni Gullas nga nagpositibo siya sa impeksiyon.
Nagkanayon ang mayor nga subo niyang gipahibawo nga nataptan siya sa COVID-19.
Siya ang ikawalong local chief executive sa Sugbo nga nakasinati sa virus base sa record sa media.
Suma pa ni Gullas, boluntaryo siyang nagpaubos sa kwarantina ug isolation sukad niadtong Martes dihang nakabatyag siyag mga timailhan sa sakit.
Midugang ang mayor nga iyang gihangyo ang mga tinugyanan sa panglawas sa pag-swab kaniya.
Gisaysay ni Gullas nga sa miaging semana hangtod sa Lunes wa siya makabantayog sintoma apan pagka Martes sa buntag dinha na nagsugod.
Matod niya, nakadawat siyag impormasyon gahapon nga positibo ang resulta sa iyang swab test.
Subay niini, gipasalig ni Gullas sa iyang mga constituents nga ang temporary niyang pagkawa dili makabalda sa paghatod og serbisyo sa maong siyudad.
Nagpatabang siya pag-ampo alang sa dali niyang kaayohan. (Jhon Tadlip/JTY)
(Source: Talisay City Public Information Office, photo courtesy of Samsam Gullas Facebook account)