Upat ka kaso ang atubangon sa tricycle driver nga nadakpan sa manhunt operation sa kapulisan sa Surigao City sa may alas dos sa hapon, Abril 4, 2020.
Kini mao ang Violation sa Article 1 section 4 sa Republic Act 11313 kon An Act Defining Gender-Based Sexual Harassment in Streets and Public Places, ikaduha Acts of Lasciviousness, ikatulo Unjust Vexation ug ikaupat Violation sa Sec. 11 sa Republic Act 9165.
Sumala pa ni Lt. Col. Christian Rafols II, ila nang nadakpan ang driver sa yellow tricycle nga may body number SC 1913 karong hapon human may tawag sa residente sa Purok 4, San Juan ngadto sa DXKS nga gigarahe sa sudlonon nga bahin ang tricycle nga gimaneho sa suspect.
Sa pagka alas onse sa buntag sa unang pag-adto sa kapulisan sa lugar, nitago ang driver hangtud pagka hapit na alas dos sa hapon sa ilang pagbalik kini nadakpan.
Ang suspect naila sa pangalang Roel Rabago Culdora o dagnay nga Potot, 43 anyos, buwag sa asawa, lumad nga taga Pilar ug nagpuyo sa Purok 11, San Juan, Surigao City.
Ang unang tulo ka kaso nagsumikad sa reklamo sa pasahero niya nga 19 anyos nga babaye nga si Anjenel Bataycan Sondon, online seller nga taga Purok 3, San Juan, Surigao City. Sa pagbutyag sa complainant, kagahapon sa buntag misakay siya sa yellow tricycle gikan sa Mercury Drug apan ang laing pasaherong babaye gihatud pag-una sa PrimeWater. Samtang nagdagan ang tricycle, nadungog niya ang mga bastos nga istorya sa driver hangtud paghidangat nila sa Purok 6, San Juan sa likod sa Destajo Tourist Inn, bandang alas 10 sa buntag, mikanaug ang driver sa gimanehong tricycle kay mangihi. Apan maoy iyang nakita nga nagdula na kini sa iyang kinatawo dajon miduol kaniya. Sa kahadlok sa dalaga, midagan kini palayo sa tricycle. Gitawag ug gisunod siya sa driver apan pag-abot sa dalaga sa may hollow block seller, wala na mosunod ang driver kaniya dihang nakakita kini nga may laing tawo.
Gi-post sa complainant sa facebook ang nahitabo kaniya hangtud nga may mga comments nga nag share sa video nga didto usab atbang sa usa ka tindahan nag masturbate ang driver.
Nagpablotter ang dalaga uban sa iyang inahan aron masumpo ang ngil-ad nga binuhatan sa driver. Gilusad dayon sa pagkahapon niadtong Abril 3 ang operation sa kapulisan ug unang napara nila ang SC 1973 nga tricycle. Sa imbestigasyon, dili mao ang hitsura sa na-share sa facebook maong ila dayon kining gi-release. Pagka adlawng Sabado, Abril 4, 2020 sa alas 11:21 sa buntag gitawagan sa Station Manager sa DXKS ang City PNP nga may residenteng nagpahibalo kaniya nga gigarahe ang tricycle sa Purok 4, San Juan. Sa pag-adto sa kapulisan uban ni Kapitan Susan Galinea, wala magpakita ang driver. Sumala pa sa igsoon niining babaye nga nilakaw kini kay gianhaan sa tag-iya sa tricycle nga ipasurrender ang yawe tungod sa pagkalambigit sa kaso. Pagka alas dos sa hapon, may nakapindot sa PNP nga anaa na ang suspect. Sa Purok 4 siya gidakop human gibasahan sa iyang constitutional rights ug gidala sa Surigao City Police Station.
Sa body search sulod sa Police Station sinaksihan nila San Juan Kagawad Justino Carbonilla ug Rey Suravazquez sa GMA 7, may nakita sa left front pocket nga usa ka plastic sachet sa dried marijuana leaves and seeds, usa ka inhaler ug cash nga 23 pesos. Gumikan sa nakuhang ebidensiya, gitakda kining ipa drug test ug mag-atubang sa ikaupat nga kasong Violation sa Sec. 11 sa RA 9165.
Nangayo’g pasaylo ang driver ngadto sa complainant apan prosegido ang dalaga nga ipasaka ang kaso. Mihilak ang driver sa laing kaso tungod kay matud pa planted ug dili daw iyaha kadtong sachet sa marijuana nga nakuot sa imbestigador sa iyang walang bulsa sa gisul-ob nga shortpant. Sumala sa kapulisan nalambigit usab ang suspect sa mga panghitabong kawat sa battery ug nabilanggo sa kasong pagpangulata sa asawa. Niadtong 2017 siya nakagawas sa prisohan human gipasaylo sa iyang misis nga nakigbuwag na kaniya. (DXKS RPN Radio Exclusive News Coverage/SM Jun Clerigo/Shela Salar Ronda 5)