Taliwala sa pandemya, padayon nga naningkamot ang lokal nga kagamhanan nga makabarog pag-usab ang ‘Tourism Industry’ sa dakbayan pinaagi sa pagpatuman sa minimum public health standards sa pagbukas sa mga tourist spots sa dakbayan.
Una nang gibuksan ang Sinulom Falls ug Bolao Spring sa Brgy. Tignapoloan, mga sinehan sa mall, agricultural sites, historical/cultural sites ug uban pang lugar nga makonsiderar nga lakip sa industriya sa turismo sa Cagayan de Oro.
Mibalik na usab sa regular nga operasyon ang mga food establishments nga ubos sa ‘Food Tourism Industry’ pinaagi sa mga food delivery system pinasubay sa health protocols alang sa dine-in customers.
Samtang nagpabilin pang sirado ang usa sa mga dakong garbo sa dakbayan nga tourist adventure destination – ang world-class white water rafting.
Ang turismo sa dakbayan naglangkob sa adventure, food, historical/cultural, recreation/leisure ug agricultural.
Subay niini, mapasalamaton si Kag. Jay Pascual, Tourism Committee Chair, sa suporta ug pagtagad nga gihatag ni Mayor Oscar Moreno ug Congressman Klarex Uy ngadto sa natad sa turismo dinhi sa dakbayan.
Giaghat usab ni Kag. Pascual ang tanang establisemento nga istriktong ipatuman ang mga health standards alang sa pagprotehir sa mga Kagay-anons ug turista nga mobisita sa mga lugar nga gipasundayag sa dakbayan. (Sangguniang Panlungsod – CdeO)