Balhog na karon sa prisohan ang usa ka Top 1 Municipal Level Most Wanted Person ug Top 7 Provincial Level Most Wanted person atol sa gikasa nga hiniusang operasyon mga alas 7:00 sa kagabhion niadtong Agosto 17, 2026.
Ang dinakpan nga wanted person naila nga usa ka 63 anyos nga lalaki kinsa gidakop pinaagi sa mga personahe sa Dumanjug Municipal Police Station, Cebu Provincial Police Office, uban sa pakig-alayon sa mga personahe sa Polanco Municipal Police Station ug sa hiniusang operasyon nga gipadagan sa paniktik sa Barangay Liong, Dumanjug, Cebu.
Ang pag-aresto sa nasangpit nga wanted person gihimo pinaagi sa gahum sa Warrant of Arrest alang sa krimen nga Murder (Article 248 sa Revised Penal Code) ubos sa Criminal Case No. 27862, nga gi-isyu ni Hon. Cherry Joy Carloto Concha-Ageas, Presiding Judge sa Regional Trial Court, 9th Judicial Region, Branch 10, Dipolog City, Zamboanga del Norte, nga gipetsahan Marso 5, 2025, nga walay girekomendar nga piyansa.
Ang dinakpan gipahibalo sa hustong paagi sa kinaiya sa iyang pag-aresto ug gipahibalo sa iyang mga katungod konstitusyon ug anaa na kini karon sa kustodiya sa arresting unit alang sa hustong dokumentasyon ug angay nga disposisyon.(MEDALYN U. BORJA)
Source: ZNPPO