Nadiskobrehan sa National Bureau of Investigation (NBI) ang toneladang gidaghanon sa imported nga bugas ang gitanggong sa mga customs officials sa Mindanao International Container Port sa Tagoloan, Misamis Oriental bisan way klarong rason.
Matud pa ni Atty. Alex Cabornay, head agent sa NBI Region 10 nagsugilon nga nalibog sila sa ilang nadiskobrehan tungod kay adunay directiba na gikan kang Customs Commissioner Isidro Lapeña nga iprioritize sa customs officials ang pagrelease sa shipment sa bugas ilabi na kon adunay insakto kini nga papeles. Apan taliwala niini, adunay igong gidaghanon sa container vans nga nagdala sa liboan nga sinakong imported rice ang gipugngan sa pantalan sa Tagoloan bisan pa nga aduna kini igong papeles.
Nasayran nga ang direktiba ni Lapeñas pinetsahan niadtong Agosto 23, 2018 nga alang sa tanang district collectors ug sub-port collectors aron pagrelease gilayon sa rice shipments silong sa minimum access volume (MAV) scheme nga adunay import permits gikan sa National Food Authority (NFA).
Anga maong kamanduan gihimo aron sa pagsiguro sa bastanteng supply sa bugas sa merkado.
Niadtong Biyernes, ang NBI nakadiskobre sa moabot 43 ka container vans kadaghanan mga Vietnam Rice nga gitanggong sa pantalan sa Tagoloan. Matud sa autoridad ang maong produkto gitanggong sukad pa niadtong bulan sa Agosto.
Ang gikatingad-an sa NBI kon ngano ang gipugngan pa pagpagula ang maong rice shipments nga unta kompleto man sa supporting documents kini, importation duties and taxes ug uban pang legal obligations nga natuman niini.
Taliwala sa maong compliance, matud ni Atty Cabornay sa NBI, dili na angay langayon pa ang pagrelease sa imported rice sa merkado.
Gidugang niya nga ila nang gisugdan ang imbestigasyon karon aron masuta kon kinsa ang manubag sa maong hitabo.